ਚੰਡੀਗੜ੍ਹ : ਔਖੀਆਂ ਪ੍ਰਸਥਿਤੀਆਂ ਅਕਸਰ ਇਨਸਾਨ ਦੀ ਅਸਲੀ ਤਾਕਤ ਨੂੰ ਸਾਹਮਣੇ ਲਿਆਉਂਦੀਆਂ ਹਨ। ਅਜਿਹੀ ਹੀ ਇੱਕ ਮਿਸਾਲ 17 ਸਾਲਾ ਕਣਿਸ਼ਕਾ ਬਿਸ਼ਟ ਨੇ ਪੇਸ਼ ਕੀਤੀ ਹੈ, ਜਿਸ ਨੇ ਨਿਮੋਨੀਆ ਦੀ ਬਿਮਾਰੀ ਨਾਲ ਜੂਝਦੇ ਹੋਏ ਆਕਸੀਜਨ ਸਪੋਰਟ ‘ਤੇ 12ਵੀਂ ਜਮਾਤ ਦੀ ਪ੍ਰੀਖਿਆ ਦੇ ਕੇ ਅਟੁੱਟ ਹਿੰਮਤ ਦੀ ਮਿਸਾਲ ਪੇਸ਼ ਕੀਤੀ। ਕਣਿਸ਼ਕਾ ਸੈਕਟਰ-26 ਸਥਿਤ ਖ਼ਾਲਸਾ ਸਕੂਲ ਵਿੱਚ ਪੜ੍ਹਦੀ ਹੈ, ਜਦਕਿ ਮਨੀਮਾਜਰਾ ਵਿੱਚ ਉਸਦਾ ਪ੍ਰੀਖਿਆ ਕੇਂਦਰ ਸੀ।
ਦੱਸ ਦਈਏ ਕਿ ਕਈ ਦਿਨਾਂ ਤੱਕ ਆਈ.ਸੀ.ਯੂ. (ICU) ਵਿੱਚ ਵੈਂਟੀਲੇਟਰ ‘ਤੇ ਜ਼ਿੰਦਗੀ ਦੀ ਜੰਗ ਲੜਨ ਤੋਂ ਬਾਅਦ ਵੀ ਉਸ ਨੇ ਹਿੰਮਤ ਨਹੀਂ ਹਾਰੀ। 17 ਫਰਵਰੀ ਨੂੰ ਆਈ.ਸੀ.ਯੂ. ਤੋਂ ਬਾਹਰ ਆਉਣ ਤੋਂ ਬਾਅਦ, ਇਸ ਬਹਾਦਰ ਧੀ ਨੇ ਐਂਬੂਲੈਂਸ ਵਿੱਚ ਆਕਸੀਜਨ ਸਪੋਰਟ ਸਹਾਰੇ ਪ੍ਰੀਖਿਆ ਕੇਂਦਰ ਪਹੁੰਚ ਕੇ ਫਿਜ਼ਿਕਸ (ਭੌਤਿਕ ਵਿਗਿਆਨ) ਦਾ ਪੇਪਰ ਦਿੱਤਾ।
ਚੰਡੀਗੜ੍ਹ ਦੇ ਸੈਕਟਰ-7 ਦੀ ਰਹਿਣ ਵਾਲੀ ਕਣਿਸ਼ਕਾ ਬਚਪਨ ਤੋਂ ਹੀ ਦਿਵਯਾਂਗ ਹੈ। ਜਨਵਰੀ 2026 ਵਿੱਚ ਉਸ ਨੂੰ ਗੰਭੀਰ ਨਿਮੋਨੀਆ ਹੋ ਗਿਆ ਸੀ, ਜਿਸ ਤੋਂ ਬਾਅਦ ਉਸ ਦੀ ਹਾਲਤ ਵਿਗੜਦੀ ਚਲੀ ਗਈ। ਡਾਕਟਰਾਂ ਨੂੰ ਉਸ ਨੂੰ ਆਈ.ਸੀ.ਯੂ. (ICU) ਵਿੱਚ ਦਾਖਲ ਕਰਨਾ ਪਿਆ, ਜਿੱਥੇ ਉਹ 13 ਦਿਨਾਂ ਤੱਕ ਰਹੀ। ਇਹਨਾਂ ਵਿੱਚੋਂ 10 ਦਿਨ ਉਹ ਬੇਹੋਸ਼ੀ ਦੀ ਹਾਲਤ ਵਿੱਚ ਵੈਂਟੀਲੇਟਰ ‘ਤੇ ਰਹੀ। ਉਹ ਅਜੇ ਵੀ ਆਕਸੀਜਨ ਸਪੋਰਟ ‘ਤੇ ਡਾਕਟਰਾਂ ਦੀ ਨਿਗਰਾਨੀ ਹੇਠ ਹੈ।
ਸਿਹਤ ਦੀ ਨਾਜ਼ੁਕ ਹਾਲਤ ਦੇ ਬਾਵਜੂਦ ਕਣਿਸ਼ਕਾ ਨੇ ਪ੍ਰੀਖਿਆ ਦੇਣ ਦਾ ਦ੍ਰਿੜ ਇਰਾਦਾ ਕੀਤਾ। ਉਸ ਨੂੰ ਐਂਬੂਲੈਂਸ ਰਾਹੀਂ ਮਨੀਮਾਜਰਾ ਮਾਡਰਨ ਕੰਪਲੈਕਸ ਸਥਿਤ ਸਰਕਾਰੀ ਮਾਡਲ ਸਕੂਲ ਦੇ ਪ੍ਰੀਖਿਆ ਕੇਂਦਰ ਲਿਆਂਦਾ ਗਿਆ। ਸਟ੍ਰੈਚਰ ‘ਤੇ ਲੇਟੀ ਕਣਿਸ਼ਕਾ ਨੂੰ ਡਾਕਟਰਾਂ ਦੀ ਦੇਖ-ਰੇਖ ਵਿੱਚ ਸਾਵਧਾਨੀ ਨਾਲ ਪ੍ਰੀਖਿਆ ਹਾਲ ਤੱਕ ਪਹੁੰਚਾਇਆ ਗਿਆ। ਆਕਸੀਜਨ ਸਪੋਰਟ ਦੇ ਨਾਲ ਉਸ ਨੇ ਨਿਰਧਾਰਤ ਸਮੇਂ ‘ਤੇ ਆਪਣਾ ਫਿਜ਼ਿਕਸ (ਭੌਤਿਕ ਵਿਗਿਆਨ) ਦਾ ਪੇਪਰ ਦਿੱਤਾ। ਕਣਿਸ਼ਕਾ ਦੀ ਹਿੰਮਤ ਅਤੇ ਪੜ੍ਹਾਈ ਪ੍ਰਤੀ ਉਸ ਦੇ ਜਜ਼ਬੇ ਦੀ ਹਰ ਕੋਈ ਤਾਰੀਫ਼ ਕਰ ਰਿਹਾ ਹੈ। ਡਾਕਟਰਾਂ ਨੇ ਉਸ ਨੂੰ ਆਰਾਮ ਕਰਨ ਦੀ ਸਲਾਹ ਦਿੱਤੀ ਸੀ, ਪਰ ਉਸ ਨੇ ਸਾਫ਼ ਕਹਿ ਦਿੱਤਾ ਕਿ ‘ਮੇਰਾ ਪੇਪਰ ਨਹੀਂ ਛੁੱਟਣਾ ਚਾਹੀਦਾ’।
The post ਹੌਸਲੇ ਦੀ ਮਿਸਾਲ ਬਣੀ 17 ਸਾਲਾਂ ਕੁੜੀ; ਆਕਸੀਜਨ ਸਪੋਰਟ ‘ਤੇ 12ਵੀਂ ਦੀ ਬੋਰਡ ਪ੍ਰੀਖਿਆ ਦੇਣ ਪਹੁੰਚੀ ਕਣਿਸ਼ਕਾ! appeared first on Punjab Star.