ਉੱਤਰ-ਪੂਰਬੀ ਅਲਜੀਰੀਆ ਵਿੱਚ ਭਿਆਨਕ ਜੰਗਲੀ ਅੱਗ ਨੇ ਭਾਰੀ ਤਬਾਹੀ ਮਚਾਈ ਹੈ। ਪ੍ਰਸ਼ਾਸਨ ਅਨੁਸਾਰ, ਇਸ ਅੱਗ ਕਾਰਨ 12 ਲੋਕਾਂ ਦੀ ਮੌਤ ਹੋ ਗਈ ਹੈ। ਇਸ ਦੌਰਾਨ, ਰਾਸ਼ਟਰਪਤੀ ਅਬਦੇਲਮਾਜਿਦ ਤੇਬੂਨ ਦੇ ਨਿਰਦੇਸ਼ਾਂ ‘ਤੇ ਅਮਲ ਕਰਦਿਆਂ, ਗ੍ਰਹਿ ਮੰਤਰੀ ਸੈਦ ਸਯੂਦ ਨੇ ਵੀਰਵਾਰ ਨੂੰ ਬੇਜਾਇਆ (Béjaïa) ਅਤੇ ਜਿਜੇਲ (Jijel) ਸੂਬਿਆਂ ਦਾ ਦੌਰਾ ਕੀਤਾ। ਉਨ੍ਹਾਂ ਨੇ ਹਸਪਤਾਲ ਵਿੱਚ ਜ਼ਖਮੀਆਂ ਨਾਲ ਮੁਲਾਕਾਤ ਕੀਤੀ ਅਤੇ ਬਚਾਅ ਕਾਰਜਾਂ ਦਾ ਜਾਇਜ਼ਾ ਲਿਆ ਹੈ।
ਅਲਜੀਰੀਆ ਦੇ ਗ੍ਰਹਿ ਮੰਤਰੀ ਸੈਦ ਸਯੂਦ ਨੇ ਦੱਸਿਆ ਕਿ ਮਰਨ ਵਾਲਿਆਂ ਵਿੱਚ ਜਿਜੇਲ ਸੂਬੇ ਦੇ ਪੰਜ, ਬੇਜਾਇਆ ਦੇ ਚਾਰ ਅਤੇ ਤਿਜ਼ੀ ਓਜ਼ੂ ਦੇ ਤਿੰਨ ਲੋਕ ਸ਼ਾਮਿਲ ਹਨ। ਉਨ੍ਹਾਂ ਨੇ ਸੜਨ ਅਤੇ ਧੂੰਏਂ ਕਾਰਨ ਪ੍ਰਭਾਵਿਤ ਹੋਏ ਲੋਕਾਂ ਦੇ ਇਲਾਜ ਦਾ ਜਾਇਜ਼ਾ ਲੈਣ ਲਈ ਬੇਜਾਇਆ ਦੇ ਕਸਬੇ ‘ਸੂਕ ਏਲ ਤੇਨੀਨ’ (Souk El Tenine) ਵਿੱਚ ਇੱਕ ਹਸਪਤਾਲ ਦਾ ਦੌਰਾ ਕੀਤਾ।
ਅਧਿਕਾਰੀਆਂ ਅਨੁਸਾਰ, ਬੁੱਧਵਾਰ ਨੂੰ ਦੇਸ਼ ਭਰ ਵਿੱਚ ਅੱਗ ਲੱਗਣ ਦੀਆਂ 159 ਘਟਨਾਵਾਂ ਦਰਜ ਕੀਤੀਆਂ ਗਈਆਂ ਹਨ। ਇਨ੍ਹਾਂ ਵਿੱਚੋਂ 36 ਘਟਨਾਵਾਂ ਸਿਰਫ਼ ਬੇਜਾਇਆ (Bejaia) ਸੂਬੇ ਵਿੱਚ ਵਾਪਰੀਆਂ; 18 ਥਾਵਾਂ ‘ਤੇ ਅੱਗ ‘ਤੇ ਕਾਬੂ ਪਾ ਲਿਆ ਗਿਆ ਹੈ, ਹਾਲਾਂਕਿ ਸੂਬੇ ਵਿੱਚ ਅਜੇ ਵੀ 18 ਥਾਵਾਂ ‘ਤੇ ਅੱਗ ਲੱਗੀ ਹੋਈ ਹੈ। ਗੁਆਂਢੀ ਸੂਬੇ ਜਿਜੇਲ (Jijel) ਦੀਆਂ 12 ਨਗਰਪਾਲਿਕਾਵਾਂ ਵਿੱਚ ਵੀ ਅੱਗ ਬੁਝਾਉਣ ਦੇ ਕਾਰਜ ਜਾਰੀ ਹਨ।
ਅਲਜੀਰੀਆ ਦੇ ਅਧਿਕਾਰੀਆਂ ਨੇ ਦੱਸਿਆ ਹੈ ਕਿ ਸਕਿਕਦਾ, ਅਲ ਤਾਰਫ, ਬੁਈਰਾ, ਤਿਜ਼ੀ ਓਜ਼ੂ ਅਤੇ ਤੇਬੇਸਾ ਸੂਬਿਆਂ ਵਿੱਚ ਲੱਗੀ ਅੱਗ ‘ਤੇ ਕਾਬੂ ਪਾ ਲਿਆ ਗਿਆ ਹੈ। ਪ੍ਰਭਾਵਿਤ ਇਲਾਕਿਆਂ ਦੇ ਕਈ ਪਰਿਵਾਰਾਂ ਨੂੰ ਸੁਰੱਖਿਅਤ ਥਾਵਾਂ ‘ਤੇ ਪਹੁੰਚਾਇਆ ਗਿਆ ਹੈ। ਇਨ੍ਹਾਂ ਜੰਗਲੀ ਅੱਗਾਂ ਦੇ ਵਿਚਕਾਰ, ਅਲਜੀਰੀਆ ਅਤੇ ਗੁਆਂਢੀ ਦੇਸ਼ ਟਿਊਨੀਸ਼ੀਆ ਭਿਆਨਕ ਗਰਮੀ ਦੀ ਲਹਿਰ ਦਾ ਸਾਹਮਣਾ ਕਰ ਰਹੇ ਹਨ। ਅਧਿਕਾਰੀਆਂ ਅਨੁਸਾਰ, ਬਹੁਤ ਜ਼ਿਆਦਾ ਤਾਪਮਾਨ ਕਾਰਨ ਅੱਗ ਦੇ ਫੈਲਣ ਦਾ ਖਤਰਾ ਵਧ ਗਿਆ ਹੈ।
ਰਾਸ਼ਟਰਪਤੀ ਅਬਦੇਲਮਾਜਿਦ ਤੇਬੂਨ ਦੇ ਨਿਰਦੇਸ਼ਾਂ ‘ਤੇ, ਸਯੂਦ ਨੇ ਸਿਹਤ ਮੰਤਰੀ ਮੁਹੰਮਦ ਸੈਦਿਕ ਏਤ ਮੇਸਾਉਦੇਨ ਦੇ ਨਾਲ ਬੇਜਾਇਆ ਅਤੇ ਜਿਜੇਲ ਦਾ ਦੌਰਾ ਕੀਤਾ, ਤਾਂ ਜੋ ਅੱਗ ਬੁਝਾਉਣ ਦੇ ਕਾਰਜਾਂ ਦੀ ਨਿਗਰਾਨੀ ਕੀਤੀ ਜਾ ਸਕੇ ਅਤੇ ਜ਼ਖਮੀਆਂ ਦੀ ਹਾਲਤ ਬਾਰੇ ਜਾਣਕਾਰੀ ਲਈ ਜਾ ਸਕੇ।
The post ਅਲਜੀਰੀਆ ਵਿੱਚ ਜੰਗਲ ਦੀ ਭਿਆਨਕ ਅੱਗ: ਹੁਣ ਤੱਕ 12 ਲੋਕਾਂ ਦੀ ਹੋਈ ਮੌਤ appeared first on Punjab Star.